W’brook & Durant fantastik, Oklahoma ngrit epërsinë

Russell Westbrook përfundoi ndeshjen me triple-double, ndërsa Kevin Durant me double-double.

Oklahoma City Thunder prej këtij momenti udhëheq 3-1 serinë finale të Konferencës Perëndimore dhe është pranë eliminimit të ekipit historik dhe kampionit aktual, Golden State Warriors.

Dyshja fatale

Westbrook është treguar fantastik sot në përballjen e zhvilluar në Chesapeake Arena, duke shënuar 36 pikë, 11 kërcime, 11 asistime si dhe duke kontribuuar me 4 vjedhje topi.

Durant ka qenë gjithashtu në nivel të lartë të lojës. Ai shënoi 26 pikë, kreu 11 kërcime të suksesshme, ndërsa dhuroi 4 asistime dhe vodhi 4 topa nga rivali për fitoren 118-94 ndaj Warriors.

SKEMA E PLAYOFFIT

Golden State Warriors në çerekun e dytë, besoni apo jo, pranoi 42 pikë në koshin e saj.

A është i lënduar Curry?

MVP i stinorit, Stephen Curry, nuk ndezi përsëri. Shuti i tij ishte jokarakterstik sot në krahasim me përballjet e stinorit të rregullt.

Bile, trajnerit Steve Kerr iu bë pyetja nëse Curry është i lënduar.

“Jo. Nuk është i lënduar. Ai po kthehet nga lëndimi që e pati. Nuk e kishte natën e vetë. Kjo ndodh. I ndodh edhe më të mirëve në botë,” kanë qenë fjalët e Kerrit pas ndeshjes.

Sidoqoftë, Golden State Warriors duken optimist para lojës së radhës që zhvillohet në shtëpinë e tyre.

“Do të mblidhemi në shtëpi dhe do t’ua rikthejmë goditjen. Do të fitojmë dhe do t’i fusim ata në presion,” ka thënë Kerr.

Curry tentoi 10 dhe shënoi 2 treshe në lojë, duke e përfunduar takimin me 19 pikë të shënuara, ndërsa më efikasi ishte Klay Thompson me 26 sosh.

Në finalen e madhe të NBA-së kualifikohet skuadra që arrin së pari 4 fitore. Tashmë, Thunder ka epërsi 3-1 dhe ndeshja e radhës zhvillohet te Warriors.