Kriza thellohet, Leganes eliminon Realin në Bernabeu

Përkundër fitores së thellë në fundjavë, Real Madridi duket se nuk është këndellur nga kriza.

Leganes që vinte me disavantazh 0-1 nga ndeshja e parë si vendas, ka arritur që të mposht madrilenët në Santiago Bernabeu 1-2 për të kapur biletën drejt gjysmëfinales së Kupës së Mbretit, për të bërë befasinë më të madhe në çerekfinale të kësaj gare prestigjioze spanjolle.

Javier Eraso i dha epërsinë Leganesit, derisa Real u kthye në lojë me Karim Benzemanë, që barazoi në fillim të pjesës së dytë në 1-1.

Dhe kur pritej që mbretërit të jepnin goditjen përfundimtare, Gabriel Pires, pas asistimit të Erasos shënoi për 1-2 që hapi dyert për ekipin e Leganesit në katërshen më të mirë të Kupës.

Tentimet tjera të Realit, me futjen e Daniel Carvajalit, Luka Modricit dhe Borja Mayoralit në lojë nuk dhanë efekt, derisa ekipi i Asier Garitanos festoi në fund.

Aktualisht, gjysmëfinalen e Copa del Rey e kanë siguruar: Sevilla, Valencia dhe Leganes. Ndërsa gjysmëfinalisti i fundit do të kuptohet nesër mbrëma, kur Barcelona pret Espanyolin në Camp Nou. Ndeshja e parë përfundoi 1-0 për Espanyolin.