DUELET DERBI
Kur e fitoi Peja për herë të fundit Prishtinën?!
19 January, 2020 @15:16
Para derbit të madh të basketbollit kosovar, Peja-Prishtina, redaksia e TopSporti.com ka hyrë në arkivë për të gjetur fitoren e fundit të verdhezinjëve ndaj bardhekaltërve - në përballjet që gjithmonë ngjallin interesim të madh.
Kjo përballje, posaçërisht këtë vit, është kthyer në atmosferën e derbit të vjetër, pasi që me rikthimin e Pejës në Superligë dhe përforcimeve të bëra, tashmë biletat e shitura për ndeshjen e vitit - deri tash - pritet të stërmbushin Karagaçin e zjarrtë për basketboll.
E fitorja e fundit e Pejës në ndeshjet e rregullta të Superligës ndaj Prishtinës daton larg.
Saktësisht fitorja e fundit e shqiponjave ndaj plisave në stinor të rregullt në Superligë daton më 15 tetor 2016, kur Peja pat mposhtur Prishtinën me rezultat 81-73.
Pra, tashmë tre vjet të plota verdhezinjtë nuk kanë shijuar fitore në stinor të rregullt ndaj prishtinasve.
E sa i përket dueleve të PlayOffit në Superligë, fitorja e fundit e Pejës daton nga stinori 2015/16 kur pat humbur serinë finale 2-3, derisa fitorja e verdhezinjëve e fundit në PlayOff ndaj bardhekaltërve kishte ardhur më 15 maj 2016, 66-63.
E sonte, pejanët presin rikthimin në lojë dhe fitore, pas përforcimeve të mëdha të bëra në afatin kalimtar të janarit dhe nën përkrahjen e madhe të tifozërisë vendase.
Se a do ta arrijnë këtë, gjithçka do të kuptohet pas ndeshjes që nis sot prej orës 17:00 në Karagaç.