Lëndimet tek sportistët - rehabilitimi i hershëm apo i vonshëm?

Problematika më e madhe e sportistëve në vendin tonë është koha apo starti i rehabilitimit/sanimit të lëndimit nga momenti i pësimit. Se sa ka rol ky fakt (koha), universitete e laboratore të ndryshme janë marrë me hulumtime që na kanë sjellë edhe shifra apo rezultate në aspekt edukimi rreth problemit të sipërpërmendur.

Nëse marrim si shembull lëndimet e muskujve të kofshës apo pulpit të këmbës tek sportistët, nga ekzaminime të realizuara nga Universiteti i Copenhagen është ardhur në përfundim se: ata që kanë filluar sanimin e lëndimit (lexo: lëndimet akute) dy ditë pas lëndimit, kanë rezultuar me rikthim më të hershëm në sport (rreth 3 javë më shpejt apo më herët) me një ulje të mundësisë për përsëritje të lëndimit, për dallim nga ata që kanë filluar rehabilitimin pas ditës së nëntë, e të cilët rikthimin në sport e kanë frenuar për disa javë shtesë duke shtuar dhe rrezikun për lëndim të sërishëm.

Studimi është përmbyllur nga Monika L. Bayer, PhD; S. Peter Magnusson, PT, DMSc dhe Michael Kjaer, MD, DMSc, të gjithë nga Universiteti i Copenhagen, duke realizuar programin tek rreth 50 sportistë, me planprogram të njejtë rehabilitimi për të gjithë dhe pa medikamente për dhimbje apo inflamacion.

Në kuadër të rehabilitimit të ndarë në 4 faza janë përfshirë:

- zgjatjet e përditshme për muskujt tjerë (java e parë)
- ushtrime izometrike të përditshme me rritje të ngarkesës (java 2-4)
- ushtrime dinamike me rritje të rezistencës, 3 herë në javë (java 5-8) dhe
- ushtrime funksionale të kombinuara me ngarkesë maksimale të forcës, 3 herë në javë (java 9-12).

Aplikimi shtesë i modaliteve tjera në kuadër të terapisë fizikale ka rol të lartë poashtu.

Si përfundim, rehabilitimi i hershëm (nga dita e dytë) i lëndimeve muskulare tek sportistët ka një mesatare rikthimi në sport prej 62.3 ditësh (48.8 - 77.4), për dallim nga ata që fillojnë rehabilitimin pas ditës së 9, me një mesatare ditësh rikthimi në sport prej 83 ditësh (64.5 - 97.3).