SIGAL PRISHTINA

BOROZANI/Erdis Driza

Lidere me fitore

29 January, 2014 @12:38

Sigal Prishtina ka rastin që me fitore sonte të përfundojë javën e radhës në Balkan League si lidere.

Djelmoshat e trajnerit turk Ceyhun Cabadak, kanë udhëtuar për në Bullgari për tu ndeshur me Balkanin e Botevgradit.

Sigal Prishtina në formë më të mirë

Sigal Prishtina takohet me Balkanin pas fitores së rëndësishme dhe të dytë ndaj Kumanovës, derisa Balkan pas humbjes nga kampioni aktual, Galil Gilboa.

Në 5 ndeshjet e fundit Sigal Prishtina ka bilanc prej 3 fitoreve dhe 2 humbjeve, derisa bullgarët, të cilët janë vendas sonte kanë 2 fitore dhe 3 humbje në po aq ndeshje, të fundit nga radha.

Takimi i parë, Sigal Prishtinës

Sa i përket ndeshjes së parë, Sigal Prishtina, kishte mposhtur lehtë Balkanin në Pallatin e Rinisë dhe të Sporteve duke e fituar me 5 pikë epërsi në fund. Në atë ndeshje, treshja Dardan Berisha, Kendrick Jones dhe Blerim Mazreku kanë qenë të pandalshëm për ekipin bullgar, derisa prishtinasit kishin epërsi gjatë gjithë ndeshjes dhe ecën sigurtë drejt fitores.

Mirëpo, bullgarët kanë formë të mirë në kampionatin vendor dhe shpresojnë në këtë ritëm për të bërë diçka kundër prishtinasve sot. Ata kanë 4 fitore në 4 ndeshjet e fundit, derisa liga elite e basketbollit bullgar ka vazhduar gjatë gjithë këtij muaji pa pushim të theksuar.

Rreziku kryesor, amerikani Dahlman

Amerikani Noel Dahlman dhe treshja bullgare Ivan Lilov, Pavel Marinov dhe Martin Marinov janë basketbollistët më të dalluar të tyre. E amerikani Dahlman përveç tjerash është koshashënuesi dhe kërcyesi më i mirë i ligës bullgare tani për tani, me 19.5 pikë për ndeshje si dhe me 11.8 kërcime për ndeshje.

Sigal Prishtina gjithsesi ka udhëtuar për fitore dhe nuk ka ndërruar diçka në ekip, përveç shtimit të Urim Zenelajt në radhët e saja. Sa i përket ekipit të Balkanit nga Botevgradi, ata shpresojnë që me fitore të futen në luftë për Play-Off të Balkan League, dersia djelmoshat e Aleksandar Todorovit nuk kanë bërë ndonjë përforcim të theksuar që nga takimi i mëparshëm me bardhekaltërit.

Rezultatet dhe tabela aktuale në BIBL.