Liderja ngrit dallimin në krye

Fitorja e tretë në katër ndeshjet e fundit ka bërë që Drenica, falë edhe rezultateve tjera të xhiros, të zgjerojë epërsinë në krye të renditjes tabelare në Grupin A të Ligës së Parë.

Ekipi i drejtuar nga Bylbyl Sokoli ka shënuar fitore pas një momentumi të kapur në fillim të pjesës së dytë, kur brenda gjashtë minutash shënoi dy herë dhe siguroi fitoren ndaj Istogut në “Demush Mavraj”.

TABELA AKTUALE

Pjesa e parë kaloi pa gola, ndërsa pas golave të shpejtë të shënuar nga Thaqi e Uka, kuqezinjtë mysafirë kontrolluan ndeshjen për të mos rrezikuar fare më tej dhe për të marrë tre pikë të radhës. Istogu - Drenica 0-2 [Arbios Thaqi 55’, Kreshnik Uka 61’].

Drenica, e vetmja e pamposhtur, është lidere e Grupit A të Ligës së Parë dhe edhe pse herët, në rrugë të mirë për të siguruar Superligën. Ekipi nga Skenderaji tash ka 28 pikë nga 12 ndeshje, kurse Istogu ka 11 pikë dhe është në pozitë të tetë.