Liria shpërdoron rastet, Drenica merr pikë në Prizren

Takimi ndërmjet dy skuadrave të pjesës së poshtme të tabelës, Lirisë dhe Drenicës, ka përfunduar me rezultat të barabartë 0-0.

Ndeshja që u zhvillua në stadiumin “Përparim Thaçi” në Prizren, pati raste të shumta, sidomos nga skuadra vendase, mirëpo golat munguan përgjatë 90 minutave.

Golit më së shumti Liria iu afrua në minutat 31’ dhe 63’, kur goditjet e afrikanit Chibueze Odi dhe Blendi Memaj, u ndalën në shtyllë.

Chibueze Odi pati edhe dy raste të tjera shënimi, por në asnjërin prej tyre nuk arriti ta mposht portierin e Drenicës, Sadiku.

Në pjesën e dytë Drenica u mundua ta gjej golin duke e inkuadruar në lojë golashënuesin Granit Arifaj, por as ai nuk arriti të bëjë diçka më shumë se bashkëlojtarët e tij.

Në minutën 71’ Liria mbeti pa kapitenin Robert Gjeraj, i cili u largua nga loja detyrimisht për shkak të lëndimit, ndërsa vendin e tij e mbuloi Elbasan Gashi.

Deri në fund të takimit vendasit rrezikuan edhe me Liridon Fetahaj, por as mundi i tij nuk dha rezultat dhe kështu takimi përfundoi pa gola.

TABELA AKTUALE

Ky rezultat i shkoi përshtati më shumë Drenicës, e cila vazhdon ta ruaj distancën prej katër pikëve me Lirinë, ndërsa kjo e fundit as pas ndeshjes së shtatë rresht nuk arrin ta gjej rrugën e fitores.

Javën e ardhshme Liria është mysafire e Besës, ndërsa Drenica udhëton në Ferizaj.