VIGAN MALOKU
TOPSPORTI/ A. P.
Udhëtimi i gjatë dhe orari ndikuan
23 January, 2019 @15:05
Bashkimi mbrëmë pësoi humbjen e shtatë nga tetë ndeshje të zhvilluara në BIBL këtë stinor.
Trajneri i ekipit, Vigan Maloku, në deklaratën e tij pas humbjes nga Academic Bultex ka thënë se ekipi ishte i lodhur nga rruga dhe kanë ruajtur lojtarët për shkak të ndeshjes së radhës.
“Mbaheshim mirë deri në fund të pjesës së parë, ndërsa në pjesë të dytë menduam të pushonim disa lojtarë për shkak të ndeshjes së radhës që e zhvillojmë të enjten (24.01). Luajtëm të dielën në Superligë, udhëtuam gjatë dhe u detyruam të ndajmë minutat mes lojtarëve. Kjo kontribuoi në diferencë të madhe në pjesë të dytë,” ka thënë Maloku, shkruan faqja zyrtare e BIBL.
Pas tetë ndeshjeve të zhvilluara Bashkimi është i pesti aktualisht në tabelën e BIBL, me gjasa minimale për të kapur pozitën e katërt që dërgon në Final Four.
Bashkimi të dielën luajti në Superligë ndaj Yllit, të martën zhvilloi duelin ndaj Academicut, ndërsa nesër luan ndaj Beroes.
