Lufta për Ligë të Parë, vazhdon sot

Ndeshja e dytë finale e “play-off”-it të Ligës së Dytë ndërmjet United Basketball dhe Kalajës do të luhet të enjten me fillim nga ora 20:00 në palestrën e sportit “Bashkim Selishta-Petriti” në Gjilan.

Skuadra e Kalajës nga Prizreni në fundjavë ka triumfuar ndaj United Basketball me shifrat 62:61 në ndeshjen e parë finale. Në rast se fiton Kalaja edhe sot, atëherë do të shpallet kampione e Ligës së Dytë, por në të kundërtën nëse triumfon United Basketball, atëherë dilema e fituesit të Ligës së Dytë do të mbetet të zgjidhet në fundjavë në Prizren.

Skuadra që shënon dy fitore do të shpallet kampione e Ligës së Dytë dhe me këtë rast do të fitoj të drejtën që nga edicioni 2017/18 të bëhet anëtare e Ligës së Parë.

Ndërkaq ekipi që do të humbas finalen do të ketë edhe një shans tjetër për të siguruar një vend në Ligën e Parë, duke u përballur me vendin e shtatë të Ligës së Parë në ndeshjet e play-out-it.