‘Masa ndaj basketbollistëve’

Skuadra e Bashkimit përkundër se ka siguruar vendin e tretë të klasifikimit për pjesën përfundimtare të stinorit, nuk është ndarë fare e kënaqur nga ndeshja e xhiros së fundit, ku ekipi portokall-e-zi, pësoi nga Vëllaznimi në Prizren. 

“Kjo humbje erdhi për shkak se basketbollistët tanë e nënçmuan skuadrën kundërshtare. Ne kemi kapacitet për të mposhtur bindshëm Vëllaznimin, por ndodhi kjo që ndodhi dhe natyrisht se nuk do të kalojë pa pasoja. Do të marrim masa ndaj basketbollistëve,” është cituar të ketë thënë sot menaxheri i skuadrës prizrenase, Arlind Kaçaniku për Kohën Ditore. 

Bashkimi ka pësuar humbjen e parë nga Vëllaznimi këtë stinor pardje. Edhe pse cilido rezultat nga kjo ndeshje nuk do të ndikonte në renditjen tabelare të ekipeve në fjalë, nga drejtuesit prizrenas është konsideruar si e patolerueshme humbja. 

Ndeshja Bashkimi-Vëllaznimi

Vëllaznimi në anën tjetër, ka shkrirë epërsinë 15 pikëshe të Bashkimit në pjesë të parë për të fituar në fund, me 100% përbërje vendore në ekip. 

Në ndeshjet tjera të Superligës këtë javë nuk ka pasur ndonjë befasi tjetër, derisa derbi i xhiros ndërmjet Trepçës dhe Sigal Prishtinës është shtyer për një datë të pacaktuar për shkak të ndeshjes së rëndësishme gjysmëfinale të ligës ballkanike që e luan kampionja e Kosovës. 

Tabela aktuale