Mijovic: Luajmë kundër një klubi jashtëzakonisht të fortë

Sigal Prishtina po shpreson t’i jep fund rezultateve negative, që i ka regjistruar që nga fillimi i këtij stinori.

Bardhekaltërit deri më tani kanë kanë tre humbje dhe asnjë fitore (dy në Superligë dhe një në Ligën Ballkanike), ndërsa në ndeshjen e katërt të tyre do të kenë punë edhe më të vështirë, pasi përballë do ta kenë skuadrën turke, Demir IBB, në kuadër të FIBA Europe Cup.

Në lidhje me këtë ndeshje, ka folur trajneri i skuadrës, Petar Mijovic, i cili tha se do të mundohet të tregojnë lojë sa më të mirë, për të arritur deri tek rezultati pozitiv.

“Luajmë kundër një klubi jashtëzakonisht të fortë dhe dëshmia më e mirë është fitorja e tyre kundër Trabzonit në elitën e basketbollit turk me 30 pikë dallim. Ne do të mundohemi që të lëmë një përshtypje sa më të mirë në këtë përballje dhe me lojë të mirë të paralajmërojmë daljen nga kriza. Në çdo ndeshje të këtij grupi ne do të futemi më dëshirën e madhe për të fituar. Nuk do të jetë lehtë, por duam të tregojmë që mund të aplikojmë basketboll të mirë kundër ekipeve të forta si Demir IBB dhe Enisey që me buxhet janë shumë përpara nesh,” tha Mijovic për faqen zyrtare të FBK-së.

Demir IBB dhe Sigal Prishtina do të luajnë nesër me fillim nga ora 18:00.