Mposhtet nga Dukagjini, Prishtina 7 xhiro pa fitore

Një tjetër paraqitje zhgënjyese për Prishtinën e drejtuar nga Abdulah Ibrakoviq.

Skuadra më e trofeshme e futbollit kosovar u mposht sot 2-1 (Mentor Zhdrella 9’, Altin Merlaku (P) 44’ / Mendurim Hoti 17’) nga Dukagjini në Klinë, për të shkuar kështu në 7 xhiro pa fitore, thellim i rekordit negativ sa i përket xhirove radhazi pa fitore.

E para në epërsi kaloi skuadra vendase, kur Mentor Zhdrella shënoi për 1-0 në minutën e 9’. Goditja e Zhdrellës ndonëse nuk ishte aq e fortë, aksidentalisht i rrëshqiti nga duart portierit Nika të Prishtinës dhe topi përfundoi në rrjetë.

Barazimi i Prishtinës erdhi shpejt, me Mendurim Hotin që shënoi për 1-1 (17’) pas krosimit të ardhur nga Oto John prej krahut të majtë.

E deri në fundin e pjesës së parë e pamë edhe një gol. Për 2-1 të Dukagjinit shënoi Altin Merlaku nga pika e bardhë (44’) dhe pjesa e parë u mbyll me këtë rezultat.

TABELA AKTUALE

Gjatë gjithë pjesës së dytë më asnjëra skuadër nuk arriti të shënojë dhe kështu ndeshja u mbyll me fitoren e Dukagjinit.

Skuadra e drejtuar nga Armend Dallku sot mori një fitore tejet të rëndësishme në luftën për mbijetesë, kurse kriza e Prishtinës vazhdon të thellohet.

Xhiron që vjen, Dukagjini i shkon Ulpianës, kurse Prishtina i shkon Niklit.