Ndërroi jetë, Gazmend Sinani

Basketbollisti i përfaqësueses së Kosovës, Gazmend Sinani, ka ndërruar jetë sot tragjikisht, pas një aksidenti rrugor.

Në po të njëjtin aksident lëndime trupore kanë pësuar edhe Granit e Fisnik Rugova, Altin Morina dhe fizioterapeuti i reprezentacionit Kujtim Shala, njofton FBK.

Federata e Basketbollit e Kosovës shpreh ngushëllimet e përzemërta familjes Sinani dhe miqve të Gazmendit për këtë humbje të pakompensueshme.

Gazmend Sinani ishte 27 vjeçar. Pasi kaloi grupmoshat e reja në Prishtinë, karrierën e vazhdoi në Turqi, ku ishte pjesë e akademisë së Fenerbahçes dhe kombëtareve turke të grupmoshave të reja.

Në Kosovë ka luajtur për Prishtinën, Bashkimin e Rahovecin, kurse në klube të ndryshme turke është paraqitur disa sezone.

Më 2017/18 luajti në ligën elite në Angli për Leeds Force, ndërsa dje bashkë me të gjithë lojtarët e përfaqëuses përfunduan pjesën e stërvitjeve në Gjakovë para ndeshjeve të radhës kualifikuese me reprezentacionin e Kosovës.