Në Athinë pa Valonin, Arbërin e Edonin

Federata e Futbollit të Kosovës ka bërë të ditur sot përmes një njoftimi se ekspedita e Kosovës është nisur për në Athinë për ndeshjen Greqia-Kosova.

Por, treshja startuese e ndeshjes së fundit ndaj Sllovenisë, Valon Berisha (Reims, Ligue1), Arbër Zeneli (Reims, Ligue1) dhe Edon Zhegrova (Basel, Superleague CH) - do të mungojnë.

“Me ekspeditën e Dardanëve nuk udhëtuan Valon Berisha, Arbër Zeneli dhe Edon Zhegrova, për të cilët pas ekzaminimeve mjekësore në mëngjes u konstatua se nuk janë në gjendje të luajnë në ndeshjen kundër Greqisë,” ka shkruar FFK në njoftimin e lëshuar së fundi.

TABELA, REZULTATET dhe NDESHJET TJERA

Mungesa e këtyre pritet të vështirësojë edhe më shumë punët e Kosovës në këtë përballje duke ditur rëndësinë e këtyre lojtarëve dhe mungesave tjera që tashmë dihen.

Por, në anën tjetër do t’i jep mundësi selektorit Bernard Challandes që të krijojë një formacion ndoshta ndryshe dhe me lojtarë që edhe do të mund të debutojnë në ekip.

Greqia - Kosova luhet të mërkurën me fillim prej orës 20:45 (14 tetor), ndërsa stërvitja e parë e dardanëve në Athinë mbahet sonte prej orës 18:00, ka njoftuar FFK-ja.