Në fund të pjesëve gola për përmbysje, Ballkani mposht Fushë Kosovën

Në një ndeshje plotësisht të dominuar nga kampioni, Ballkani ka arritur të vazhdojë serinë e fitoreve në Superligë, duke e mposhtur sot edhe Fushë Kosovën me rezultat 2-1 [Walid Hamidi 45’+1, Qëndrim Zyba 87’ - Osman Mëziu 4’].

Golat e Ballkanit kanë ardhur në fund të pjesëlojëve përkatëse, ndërsa Fushë Kosova kishte marrë epërsinë herët në ndeshje me një super-gol të ish-sulmuesit të Drenicës, Osman Mëziu.

Sidoqoftë, epërsia befasuese e mysafirëve nuk demoralizoi vendasit që dalëngadalë morën plotësisht kontrollin e lojës dhe shkuan te fitorja me golat e shënuar në fund të pjesëve, ndërsa kishin raste të shumta përgjatë ndeshjes, veçanërisht në pjesë të dytë për të shënuar, ku disa prej tyre nuk qëlluan kornizën e portës, e disa u ndalën nga portieri i Fushë Kosovës, Armend Ruxhi.

Walid Hamidi u gjend pranë portës kundërshtare, kur në kohën shtesë të pjesës së parë një intervenim jo i sigurt nga portieri i mysafirëve, pa topin para tij - që nuk e pati të vështirë ta shndërronte në gol (45’+1).

TABELA AKTUALE

Në pjesë të dytë disa raste të mira të Ballkanit për të shënuar nuk gjetën portën. Hamidi (57’), Armend Thaqi (59’), Albin Berisha (69’) me raste konkrete, ndërsa një krosim i mirë i Armend Thaqit në minutën e 87. të duelit gjeti Qëndrim Zybën në këndin e djathtë të Ruxhit, që shutoi furishëm për të dhënë fitore për ekipin e Ilir Dajës.

Ballkani mori fitoren e gjashtë me radhë në Superligë, ndërsa të dymbëdhjetën këtë stinor, për të mbajtur distancën 10 pikëshe ndaj ndjekësit kryesor, Dritës. Xhiron e XVI Ballkani e mbyll me 38 pikë nga 14 ndeshje të luajtura (dy i ka të shtyera, ndaj Dritës dhe Gjilanit), kurse Fushë Kosova mbetet në 10 pikë nga 16 ndeshje të luajtura, në vend të parafundit të Superligës.

Në xhiron e radhës, Ballkani udhëton te Llapi, ndërsa Fushë Kosova shkon afër - në Prishtinë.