NEW BASKET - VUSHTRRIA
TOPSPORTI / Arian Paçarizi
Në ndeshjen e mbetur, fitues doli New Basketi
8 December, 2019 @21:38
Ndeshja e mbetur e xhiros së shtatë në Ligën e Parë të Kosovës në basketboll, përfundoi me fitoren e New Basketit, i cili e mposhti Vushtrrinë me rezultat 58-55.
Skuadra e Vushtrrisë 3 çerekët e parë i përfundoi në epërsi, derisa në çerekun e fundit, New Basketi duke pësuar 9 pikë dhe duke shënuar 17, e mposhti kundërshtarin me 3 pikë epërsi.
Hajriz Hajzeri ishte më i dalluari te New Basketi me 14 pikë, 7 kërcime e 7 asistime, derisa u ndihmua edhe nga Ensar Muriqi me 13 pikë e 11 kërcime dhe Lavdim Morina me 12 pikë, 6 asistime e 5 topa të rrëmbyer.
Te Vushtrria Erhan Sholla u veçua me 21 pikë, 6 asistime e 4 kërcime, derisa ishte i vetmi me pikë dyshifrore te skuadra mysafire.
Kjo ishte fitorja e dytë e sezonës për New Basketin dhe me 6 humbje aktualisht është larguar nga zona e rrezikshme me një ndeshje më shumë, kurse Vushtrria me një
ndeshje më pak dhe me bilanc prej 2 fitoreve e 5 humbjeve gjendet në pozitën e shtatë.
Në xhiron tjetër New Basketi pushon, kurse Vushtrria përballet me Istogun.
