Në Plovdiv në kërkim të fitores së parë

Rahoveci është në kërkim të fitores së parë në gara ndërkombëtare. Pas eliminimit nga FIBA Europe Cup dhe fillimit të BIBL, ku vreshtarët po debutojnë, tash me trajnerin e ri të skuadrës, Marjan Ilievski, dhe me përforcim shtesë të bërë ditë më parë - Rahoveci është duke kërkuar fitoren e parë ndërkombëtare.

Vreshtarët kanë kryer stërvitjet sot në Pllovdiv të Bullgarisë, ndërsa nesër pasdite luhet ndeshja mes Academicut dhe Rahovecit në kompleksin Sila të këtij qyteti.

Përndryshe, për Academicun kjo do të jetë ndeshja e parë e stinorit në BIBL, ndërsa ekipi ka regjistruar një përforcim shtesë së fundi, duke shtuar në radhët e veta amerikanin Cedrick Bowen, që ka qenë pjesë e ekipit edhe dy stinorë më parë.

Rahoveci është mposhtur në dy ndeshjet e para të BIBL-it. Vreshtarët kanë humbur ndeshjen debutuese në këtë ligë nga Peja në Karagaç, ndërsa në Mizahir Isma janë mposhtur nga Ibri i Rozhajes.

Dueli Academic - Rahoveci luhet të martën më 12 nëntor 2019 me fillim në ora 17:30 dhe transmetohet direkt nga sportmedia.tv. Drejtësia në këtë ndeshje do të ndahet nga treshja e referëve grek: Stelios Symeonides, Nikos Tziopanos dhe Constantinos Poursanidis.

TABELA AKTUALE:

1. Ibri 2-0
2. Peja 1-1
3. Rahoveci 0-2
4. Vllaznia 0-1
5. Academic 0-0