Peja, me 5 të huaj në Superligë

Peja ka ri-regjistruar qendrën amerikane Mario Austin për garat e Superligës në basketboll, ka bërë të ditur Federata e Basketbollit të Kosovës në njoftimin e saj.  Borozani.com

Austin, nuk u paraqit fare në ndeshjet e Pejës në kuadër të Kupës së Kosovës, ku Peja fitoi trofeun në finale duke mposhtur Prishtinën, derisa Boris Kurtovic kishte vendosur për këtë katërshe: Jozo Brkic, Nic Wise, Janou Rubin dhe Jaleel Nelson. 

Me ri-regjistrimin e Austinit, Peja tashmë mund të zëvendësojë cilindo të huaj para xhiros së radhës së Superligës deri në fund të stinorit, natyrisht duke njoftuar FBK-në një ditë para ndeshjes së radhës. 

FBK lejon paraqitjen e katër të huajve në ndeshje të garave që i organizon, mirëpo nuk ndalon mbajtjen e më shumë të huajve në ekip. 

Për të pasur mundësinë e ndërrimit të të huajve (ato ekipe që i kanë mbi 4 të huaj) ekipet paguajnë 2 mijë euro për regjistrimin e lojtarit të pestë të huaj për gara vendore. Një gjë të tillë e bëri edhe Sigal Prishtina xhiron që shkoi, duke e shtuar Bojan Trajkovskin në gara vendore. 

Si shembull: Prishtina në gjysmëfinale të Kupës ndaj Trepçës kishte luajtur me katërshen: Boris Trajkovski, Demontez Stitt, Jordan Hulls dhe Julian Mavunga. Ndërsa në finale kishte luajtur me katërshen: Edin Bavcic, Demontez Stitt, Jordan Hulls dhe Julian Mavunga. 

Tash e tutje sipas nevojës, Peja do të mund të përzgjedh para çdo ndeshjeje se cilin nga 5 të huajt ta lë jashtë ndeshjes dhe të formojë katërshen që i nevojitet sipas kundërshtarit.