Pranimi ndërkombëtar afër

Arbnor Rifati ka treguar se gjyqtarët nga Kosova janë tejet cilësor. Ai ka qenë referi që është përcaktuar të drejtojë edhe finalen e turneut në Holandë, por për shkak se Kosova U-18 arriti finalen ai u desht që t’i gëzohet triumfit të përfaqësueses në Limburg Basketball Trophy. 

Në një bisedë ekskluzive me Borozani.com Rifati ka treguar për përvojën e tij në Holandë si dhe për mundësitë që gjyqtarët kosovarë të ndajnë drejtësinë në Ligën Ballkanike. 

“Kam gjykuar tre ndeshje në Limburg Basketball Trophy 2013. Virgen Carmen(SPA)-Toronto Knights(KAN); Gembo(BEL)-Eindhoven(HOL) dhe Virgen Carmen(SPA)-Almnote(HOL). Pastaj u delegova që të referojë edhe finalen, por ajo u tërhoq pasi që përfaqësuesja e Kosovës U-18 arriti në finale,” ka treguar Rifati ndeshjet e gjykuara.

Ai është pritur tejet mirë nga kolegët e tij ndërkombëtar, ndërsa respekti i treguar ndaj Rifatit nga ndërkombëtarët nuk e ka befasuar për shkak të kulturës së lartë të tyre, ka shtuar Rifati. 

“Organizatorët e turneut nuk kanë shpallur referin më të mirë, por kanë qenë të vetëdijshëm se cilësia e ligës kosovare është më e lartë se ajo holandeze dhe nuk kanë nguruar asnjëherë të më pyesin për telashe që kanë të bëjnë me referim,” tregon kolegialitetin dhe afërsinë e tij me homologët ndërkombëtar. 

Në anën tjetër, sa janë gjasat që pas pranimit të Sigal Prishtinës dhe Pejës në Ligën Ballkanike të referojnë kosovarët në këtë ligë, Arbnori ka dilema, por shpreson në ndërkombëtarizim të shpejtë të basketbollit kosovar.  

“Të them të drejtën, prej momentit që ishim pjesëmarrës në seminarin e organizuar nga Liga Ballkanike, drejtori i kësaj lige, Shay Shtriks, ka thënë se duhet të ndihemi të privilegjuar që jemi pjesë e seminarit dhe të lumtur që jemi në këtë rreth. Mirëpo, pa qenë pjesë e FIBA-së është problematike. Ne jemi optimist që nëse jo sivjet, vitin tjetër do të jemi pjesë e FIBA-së dhe shpresoj që ekipi që kemi qenë në Bullgari: unë, Alban Vula, Xhelal Mumini dhe Daut Mehmeti, të jemi pjesë e referëve të parë ndërkombëtar aty nga Kosova,” ka thënë në fund Rifati duke përgëzuar dhe falenderuar Borozani.com për punën rreth basketbollit kosovar si dhe sportit në përgjithësi.