Prej kampiones në disfatën më të thellë

Stinori 2011/12 kishte sjellë gëzim të madh në Mitrovicë. Skuadra e Trepçës me Drilon Hajrizin në top formë dhe me amerikanin Jaleel Nelson e qendrën boshnjake Emir Zimic, shto këtu forcat lokale si Gazmend Asllani, Imer Tahiri e Besnik Azemi, kishin arritur të mposhtin Sigal Prishtinën në finale të Play-Offit 3-2 për tu stolisur me titullin kampion të Kosovës. 

Pas këtij stinori ekipi mitrovicas mbetet pa palestrën Minatori, kur ia nis renovimi i sallës - që ende nuk ka përfunduar!!!

Ndërsa kampioni i atëhershëm më asnjëherë nuk ishte në formë të njejtë. 

E disfata e djeshme ndaj Yllit në Suharekë ka qenë goditja më e madhe që e ka marrë ky ekip ndoshta edhe në më shumë kohë sesa që prej shpalljes kampion të tyre. Thejsht, nuk mbahet mend që Trepça të ketë pësuar nga ndonjë skuadër me 47 pikë diferencë, siç ndodhi mbrëmë kur ekipi i rikthyer në elitë, Ylli, mposhti 111-64 Trepçën. 

Kjo është disfata e tyre më e thellë që në 4 vitet e fundit e ndoshta edhe më gjërë.

Trepça që prej shpalljes kampion nuk ka arritur të luajë në asnjë finale, as të Kupës e as të Play-Offit, ndërsa stinorin aktual e përfundoi në pozitën e katërt me bilanc neutral, 7 fitore e 7 humbje.