Prishtina-01 fiton Kupën e Kosovës

FC Prishtina 01 ka fituar për herë të dytë Kupën e Kosovës në futsall. Në ndeshjen finale, e cila u zhvillua të enjten në mbrëmje, në Pallatin e Rinisë dhe Sportit në Prishtinë, në një atmosferë madhështore, ekipi kryeqytetas triumfoi në duel me ekipin nga Drenasi, FC Liqeni, me rezultat 2:0. Loja ishte tejet e baraspeshuar, megjithëse që nga fillimi u vërejt dominim i lehtë i kryeqytetasve. Derisa pjesa e parë nuk prodhoi gola, në të dytën Prishtina 01 arriti ta gjejë rrugën e golit fillimisht përmes Ramadan Alajt, e më pas epërsinë e dyfishoi Ermir Kryeziu. Në minutat e mbetura, FC Liqeni përkundër presionit të vazhdueshëm dhe përpjekjeve për të bërë ndryshim në epilogun e ndeshjes u detyrua të pajtohet me humbjen, pasi mbrojtja e kryeqytetasve ishte në nivelin e duhur. Në fund trofeun për ekipin fitues e dorëzuan bashkërisht presidenti i FFK-së, Agim Ademi dhe kryetari i komunës së Prishtinës, Përparim Rama, derisa medaljet i ndanë edhe drejtorët për sport të Prishtinës dhe Drenasit, Granit Rugova e Enkela Dema, si dhe kryetari i Komisionit të futsallit, Hysni Gjinovci. Herën e parë Prishtina 01 iu kishte gëzuar këtij trofeu në vitin 2020.