Prishtina ia shkakton Pejës humbjen më të thellë të stinorit

Kampionia aktuale e Superligës, Prishtina, me një lojë të mirë që nga fillimi i ndeshjes, ka arritur që t’ia shkaktojë Pejës humbjen më të thellë të këtij stinori.

Mund të duket pabesueshëm, por bardhekaltërit shënuan fitore me 44 pikë dallim ndaj verdhezinjëve. Totalisht e papritur kjo performancë e pejanëve, ndërsa Prishtina shfrytëzoi gjithçka për të thelluar humbjen e Pejës.

Bardhekaltërit, kujtojmë, nuk e kanë pasur në ekip fare dyshen Edmond Azemi e Dardan Berisha, por kjo nuk i ka penguar lojtarët tjerë të disponuar të skuadrës, nën drejtimin e trajnerit Bujar Loci, që t’ia shkaktojnë mysafirëve, të humbur në fushë sonte, humbjen më të thellë të stinorit, 104-60.

TABELA AKTUALE

Dominimi i Prishtinës i nisur që në fillim të takimit, ka vazhduar gjatë gjithë ndeshjes, ndërsa bardhekaltërit fituan çdo çerek të lojës, përjashto të dytin, që përfundoi baraz: 33-9, 25-25, 19-17 dhe 27-9.

Bujar Loci i dha mundësi të gjithë basketbollistëve që kishte në dispozicion që të paraqiten në këtë ndeshje.

Ndërsa lojë tepër të mirë tregoi Meriton Ismaili, i cili u bë koshashënuesi më i mirë i ndeshjes, kur shënoi treshe në minutën e fundit të ndeshjes.

TABELA AKTUALE

Ismaili luajti me 21 pikë (3/5 për tre pikë), 4 kërcime e 4 asistime. Nga 18 pikë shënuan edhe Divine Myles e Mikaile Tmusic te bardhekaltërit, ndërsa dyshifror pikësh regjistruan edhe Fahro Alihodzic 13, Arian Memeti 12 dhe Fisnik Rugova 10.

Te Peja, që nuk u këndell assesi pas fillimit të dobët të ndeshjes, më efikasi ishte Henrik Sirko me 12 pikë të shënuara. Kurse Drilon Hajrizi i përjashtuar me gabim teknik në çerek të dytë, mbeti te 7 pikët.

Fitorja, rikthen Prishtinën 7-3 në pozitën e tretë për momentin. Ndërsa Peja 4-6 tashmë ka në rrezik edhe pozitën e gjashtë.