Prishtina, me mish e shpirt, te fitorja

Fitore e madhe në një spektakël që dinë ta bëj kampionja e Kosovës. Sigal Prishtina ka luftuar me mish e shpirt përgjatë gjithë 40 minutave lojë për të arritur fitoren e shumëkërkuar në fund ndaj Sutjeskës dhe për të dalë me bilanc pozitiv në tabelë, 3 fitore e 2 humbje. 

Sigal Prishtina në fakt, nuk ia nisi mirë ndeshjes, derisa mysafirët shënonin lehtë, posaçërisht me precizitetin e lartë nga vija e treshit. 

Sidoqoftë trajneri Marjan Ilievski kërkoi pak më shumë agresivitet me kohë dhe lojtarët arritën të këndellen në çerekun e dytë, që përfundoi baraz 24-24, ndërsa pjesa 38-47. 

Çereku i tretë ishte një mesele krejt tjetër. Prishtina u këndell dhe me pikë të shpejta, lojë të mirë arritën të barazojnë rezultatin e përgjithshëm për të hyrë në dhjetë minutëshin e fundit 69-69. 

Në fund, 5 minutat e para të çerekut të katërt shkuan barabartë, derisa epërsia ndërrohej herë në njërën e herë në anën tjetër, derisa 2 minuta para fundit të takimit bardhekaltërit krijuan epërsi 5 pikëshe, që e ruajtën edhe në sekondat e fundit për fund të rehatshëm dhe fitore tejet të rëndësishme. 

Dardan Berisha ka shënuar 37 pikë sonte, derisa ka regjistruar edhe 8 asistime dhe 1 vjedhje topi krahas 5 kërcimeve për të marrë epitetin e lojtarit të ndeshjes. 

Ndihmë e jashtëzakonshme për Dardanin ka ardhur nga dyshja Jordan Hulls dhe Edin Bavcic, të cilët kanë kontribuuar me pikë, asistime e kërcime, kur Berisha bllokohej nga rivali. 

Bavcic përfundoi ndeshjen me 25 pikë dhe 8 kërcime, derisa Hulls me 15 pikë, prej të cilave 3 treshe, 5 asistime dhe 7 kërcime. 

Ndihma e debutuesit Bojan Trajkovski ka qenë për tu vlerësuar. Qendra maqedone e ardhur së fundi në Prishtinë ka treguar përvojë kolosale nën kosh duke shënuar 10 pikë, e kapur tetë kërcime për 20 minuta sa ishte në lojë. 

Te Sutjeska që humbi më të dalluarit ishin Radosav Spasojevic me 24 pikë e 7 kërcime, derisa Nikola Pavlicevic regjistroi double-double prej 20 pikëve dhe 11 asistimeve. 

Pas kësaj ndeshjeje Prishtina ka bilanc prej tre fitoreve e dy humbjeve, derisa Sutjeska mbetet me 1 fitore karshi 4 humbjeve. 

REZULTATET DHE TABELA AKTUALE

Statistikat ekipore

	SIGAL PRISHTINA	SUTJESKA
Çereku i parë	14	23
Çereku i dytë	24	24
Çereku i tretë	31	22
Çereku i katërt	30	23
Kërcime	40	28
Asistime	23	17
Bllokada	2	2
Topa të vjedhur	3	10
Topa të humbur	15	8
Tentime për tre pikë	12/22	10/36
Tentime nga loja	35/63	37/76
Gjuajtje të lira	17/24	8/10

Statistikat individuale te Sigal Prishtina

1	Dardan Berisha	37 pikë	6 kërcime	8 asistime
2	Edin Bavcic	25 pikë	8 kërcime	3 asistime
3	Jordan Hulls	15 pikë	7 kërcime	5 asistime
4	Bojan Trajkovski	10 pikë	8 kërcime	2 asistime
5	Edmond Azemi	6 pikë	2 kërcime	1 asistim
6	Julian Mavunga	4 pikë	3 kërcime	4 asistime
7	Blerim Mazreku	2 pikë	-	-

Statistikat individuale te Sutjeska

1	Radosav Spasojevic	24 pikë	7 kërcime	2 asistime
2	Nikola Pavlicevic	20 pikë	4 kërcime	11 asistime
3	Nemanja Arsic	17 pikë	4 kërcime	-
4	Nikola Zizc	12 pikë	5 kërcime	1 asistim
5	Nemanja Vranjes	9 pikë	3 kërcime	1 asistim
6	Aleksa Ilic	6 pikë	-	-
7	Marko Calic	2 pikë	2 kërcime	1 asistim
8	Marko Ljujic	2 pikë	1 asistim	-