Pse Kosovës i duhet së paku vendi i tretë?

Përfaqësuesja e Kosovës në basketboll më 31 gusht nis për herë të parë në histori të saj kualifikimet për një kampionat europian, Eurobasket 2017.

Kosova do të ndeshet me Slloveninë në Ljubljanë, ndërsa në grup ka edhe Ukrainën e Bullgarinë.

GRUPET KUALIFIKUESE EUROBASKET2017

Ekipi i drejtuar nga Arben Krasniqi do të duhet që të përfundojë së paku i treti në grup, në rast të moskualifikimit në Eurobasket 2017.

Pse?

Sepse vendi i tretë në çdo grup kualifikues për Eurobasket 2017 do të sigurojë pjesëmarrje në kualifikime për Kampionatin e ardhshëm Botëror të basketbollit, mëson Borozani.com, që është paracaktuar të zhvillohet në Pekin të Kinës, në vitin 2019.

Favorite absolute në grupin e Kosovës është Sllovenia, ndërsa luftën kryesore Kosova pritet ta bëj me Bullgarinë, pasi që edhe Ukraina ka yje të Euroligës në ekip dhe është e fuqishme.

ORARI I NDESHJEVE TË KOSOVËS

Kosova ndeshjen e parë e zhvillon ndaj Sllovenisë pasnesër, pastaj radhazi: pret Ukrainën, i shkon Bullgarisë, pret Slloveninë, i shkon Ukrainës dhe e përfundon ndaj Bullgarisë si vendase.

Vendi i parë i secilit grup kualifikues siguron Eurobasketin 2017, i dyti varet nga renditja e grupeve tjera, ndërsa i treti dhe i katërti eliminohen.

Pozita e katërt nuk siguron as pjesëmarrjen në kualifikime për Kampionatin Botëror “Kina 2019”, përveç rasteve speciale, wildcard, ndërrim rregulloreje ose diçka tjetër e paparashikuar më parë.

Kapiteni i përfaqësueses së Kosovës, Edmond Azemi, shpreson që Kosova të arrijë së paku tre fitore në grupin kualifikues.

Vendet organizatore: Finlanda, Izraeli, Rumania dhe Turqia kanë të siguruar Eurobasket 2017-shin. Atyre iu bashkangjiten edhe: Spanja e Lituania, si finaliste të Eurobasket 2015 dhe pjesëmarrëse në LO Rio 2016, si dhe pjesëmarrësit në kualifikime për LO Rio 2016: Kroacia, Çekia, Franca, Greqia, Italia, Letonia e Serbia.