Rahoveci drejt Superligës, me Spaqin

Rahoveci ka bërë një freskim në skuadër në fillim të stinorit. Ky freskim i skuadrës ka sjellë një seri rezultatesh impresive për skuadrën e Ligës së Parë të Kosovës në basketboll dhe tashmë ekipi po kërkon ngritjen në Superligë, pas serisë perfekte në pjesë të parë të stinorit. E njëri ndër më të merituarit për këtë duket të jetë trajneri i skuadrës, Valentin Spaqi, që është duke i bërë hapat e para të karrierës së tij të trajnerit. 

Stinori pranveror i Ligës së Parë fillon në fund të muajit janar 2016, ndërsa Spaqi shprehet i bindur për ngritjen në rangun më të lartë të garave të basketbollit, e për më tepër se si e çka bëri që ai të nis trajnerllëkun, në vazhdim. 

1. Çka e shtyu Spaqin që të drejtohet nga trajnerllëku? 

Spaqi: Në kohën kur kam qenë lojtar, gjithmonë kam menduar dhe kam thënë çka kur të plakem si lojtar? Si do të jem afër basketbollit? Për të qenë më afër basketbollit, vendosa që të nisja me zejen e trajnerit. E pasi që dhashë dorëheqje nga detyra e drejtorit sportiv të Bashkimit, aty ku fillova dhe përfundova karrierën si lojtar, filluan ofertat e ndryshme për të nisur punën si trajner. Nga disa oferta të ndryshme me kategori të reja si në Superligë e si në Ligë të Parë, personalisht më joshi oferta e KB Rahoveci, sepse qasja e drejtuesve të klubit ishte në përputhje me atë që mendoja unë, në rrugë për tu bërë ekip serioz. 

2. Si financohet klubi i Rahovecit aktualisht? 

Spaqi: KB Rahoveci financohet nga njerëz të vullnetit të mirë, StoneCastle, Komuna, etj. 

3. Kush ka qenë model për Spaqin trajner? 

Spaqi: Kam pas fat të luaj edhe jashtë Kosove, ku kam mësuar si lojtar shumë nga Jaksa Vulic. Pastaj sa i përket zhvillimit të karakterit i falenderoj të ndjerit Dervish Agaj, ndërsa si model në lojë kam mësuar shumë nga Toni Bevanda dhe besoj që me atë filozofi do të vazhdojë edhe tutje si trajner. Kjo sa i përket asaj si model nga aty ku kam parakaluar unë, ndërsa në glob, kisha me thënë Phil Jacksonin nga koha e Chicago Bullsave. Nga trajnerët e huaj në Kosovë më kanë pëlqyer edhe Ekrem Memnun, Vlado Vanjak, Boris Kurtovic e Muki Vugdalic. 

4. Çka aplikon në lojë Spaqi trajner, sipas rëndësisë? 

Spaqi: I jap rëndësi shumë mbrojtjes dhe kundërsulmit të mirë, ku pas këtyre dy detyrave lojtarët janë komod për sulm të relaksuar. 

5. Te KB Rahoveci, cila është baza e ekipit aktualisht? 

Spaqi: Puna dhe përgjegjësia maksimale e djelmoshave, ku duke i falenderuar dy basketbollistëve më të vjetër në ekip B. Sharkut dhe B. Kapitenit, edhe atmosfera e mirë po mbizotëron aty. Si ekip, besoj që mund t’ia dalim me cilindo ekip nga pjesa e poshtme e Superligës që tash. 

6. A punohet me të rinjtë aty? 

Spaqi: Eh, kjo është njëra ndër ato anët e mira të Rahovecit, si vend dhe si klub dhe planet e tyre. Këtu është punuar edhe më heret, por tani me përkrahjen edhe të FBK-së me trajnerin Chris Dial do t’i gërshetojmë planet për të nxjerrë një gjeneratë të mirë në vijim. Kësaj nëse i shtohet edhe përkrahja nga kreu i Komunës atëherë shpresojmë të jetësohen planet tona si ekip. 

7. Çka synon Spaqi në karrierë si trajner?

Spaqi: Unë asnjëherë nuk kënaqem me pak dhe normalisht synoj suksesin bashkë me bashkëpunëtorët e mij dhe me ndihmën e Zotit. Primare për mua është të nxjerrë ndonjë talent dhe t’i ngris ata në karrierë, duke punuar pa u kursyer me të rinjtë. 

Në fund, Spaqi ka falenderuar gjithë përkrahësit e tij duke shpresuar që sa më shpejtë të arrij Superligën si trajner me Rahovecin. Si lojtar të gjithë e njohin atë që në nismë të karrierës pas Bashkimit kaloi në Prishtinë ku ndërroi disa ekipe sipas kohës dhe në fund, përsëri iu kthye qytetit të tij për të mbyllur karrierën. Ai është një ndër basketbollistët që ka fituar tituj kampioni dhe Kupa në Kosovë. 

TABELA AKTUALE E LIGËS SË PARË

KB Rahoveci, tashmë ka serinë 10-0 nga pjesa vjeshtore e stinorit dhe pritet që të vazhdojë në të njejtën mënyrë deri në fund të stinorit të rregullt me Spaqin trajner. Pjesa e dytë e stinorit nis më 30/31 janar.