RAHOVECI 96-63 LIPJANI
Rahoveci lehtë ndaj Lipjanit
5 October, 2019 @22:40
Nënkampioni i Kosovës, Rahoveci, pa shumë telashe ka kaluar edhe pengesën e xhiros së tretë në Superligë, Lipjanin.
Vreshtarët prej fillimit të ndeshjes kanë marrë epërsi të konsiderueshme dhe me kohë, duke e ngritur atë, kanë shënuar fitore të lehtë, duke arritur që të shënojnë fitoren e dytë me radhë këtë edicion.
Çereku i parë përfundoi 28-15 në të mirë të vendasve në Mizahir Isma, pastaj i dyti 21-17, ndërsa i treti 21-14, për çerekun e fundit 26-17 dhe përfundimtaren 96-63 në të mirë të tyre.
Më efikasi te Rahoveci ka qenë Javis Howard, që shënoi 18 pikë, 10 kërcime e 2 asistime në fitore, derisa trajneri Neven Plantak i dha mundësi të gjithë lojtarëve të paraqiten në ndeshje, me më së paku 5.4 minuta lojë.
Arian Qallaku u dallua me 17 pikë, ndërsa LJ Booth dha 15 pikë e 9 kërcime në fitoren e dytë të ekipit.
Te lipjanasit, që tashmë pësuan humbjen e tretë me radhë të stinorit më efikasit kanë qenë dyshja amerikane Marquise Simuels dhe Demarkus Stuckey JR me nga 22 pikë secili.
