KTHIM FANTASTIK I MVPsë
Rikthim fenomenal i Steph Curryt pas lëndimit. Me rekord në vazhdime, me 40 pikë në ndeshje dhe shumë afër triple-doubleit/ Foto: koin.com
Rikthim fenomenal i Curryt
10 May, 2016 @9:32
Golden State Warriors ka shënuar fitore pas vazhdimeve ndaj Portland Trail Blazersit për të marrë epërsinë 3-1 në serinë gjysmëfinale të Konferencës Perëndimore, ndërsa Stephen Curry është kthyer në top formë pas lëndimit të lehtë që kishte.
Curry ka shënuar 40 pikë në fitoren 132-125 të ekipit të tij, ndërsa me 17 pikë të shënuara në vazhdime, ka thyer rekordin e NBA-së.
“E dua këtë lojë. E dua lojën dhe garën. Me të vërtetë më kanë munguar shokët e skuadrës,” ka thënë Curry pas fitores së kampionit aktual në rrugë për mbrojtje të titullit për nba.com sot.
40 pikët e Curryt u shoqëruan edhe me 9 kërcime e 8 asistime nga MVP-ja, ndërsa atij i ndihmuan edhe Klay Thompson me 23 dhe Draymond Green me 12 pikë tjera të shënuara.
Te Portland, që u mundua mjaft të barazojë serinë ndaj kampionit, më të dalluarit kanë qenë Damian Lillard me double-double prej 36 pikëve dhe 10 kërcimeve si dhe Al-Farouq Aminu me 18 pikë e 13 kërcime të regjistruara.
Golden State Warriors ka rast të sigurojë finalen në shtëpi, ku luhet përballja tjetër në mëngjesin e hershëm të 12 majit.
