Rreth 12 mijë € dënim për Prishtinën, ish lojtari fiton rastin në BAT

Sigal Prishtina ka marrë lajm të keq nga Gjykata e Arbitrazhit në Basketboll (BAT).

Bardhekaltërit janë obliguar të paguajnë saktësisht 11,800 € për shkak të ish basketbollistit të tyre, Denis Krestinin, i cili e ka fituar rastin nga ankesa e tij në BAT.

Krestinin, i cili ka luajtur për Sigal Prishtinën gjatë stinorit 2018-19, është ankuar në BAT për pagat e papaguara ndaj tij.

Për këtë, ai do të përfitojë 3,300 € si shumë për pagat e papaguara, përfshirë edhe pagesat për bonuse. Ndërkohë Sigal Prishtina do të detyrohet të paguajë gjithashtu edhe 500 € shtesë si dëmshpërblim për pagesë të vonuar ndaj lojtarit, pastaj 3,500 € për kostot e këtij arbitrazhi, si dhe 4,500 € të tjera ndaj lojtarit për shpenzimet e çështjeve ligjore.

Njoftimi për këtë dënim ndaj Sigal Prishtinës është publikuar edhe në faqen e FIBA-s. (shiko këtu)

Rasti i lojtarit Denis Krestinin nuk është i pari që një lojtar i huaj po përfiton shuma të majme nga klubet kosovare nëpërmjet të BAT-it. Për dënime të tilla më herët janë obliguar t’i kryejnë pagesat edhe klubet e tjera kosovare, të cilëve u janë shkaktuar probleme të mëdha dhe të parituara në aspektin financiar.

Kujtojmë se lojtari nga Lituania ka luajtur gjithsej 41 ndeshje me Sigal Prishtinën, përfshirë ato në garat e Superligës, FIBA Europe Cup dhe FIBA Champions League.