S’bëjnë punë 35 pikët e Dardanit, Prizreni mposht Pejën

Me rezultat 96-92 është mbyllur ndeshja e zhvilluar sonte mes Prizrenit dhe Pejës në “Sezai Surroi”, ndeshje e vlefshme për xhiron e parë të stinorit pranveror në Superligën e Kosovës në basketboll.

Ndeshja që përveç publikut vendas, të pranishme i pati edhe “Shqiponjat” e Pejës, kaloi me luftë mjaft të fortë, me rezultatin që kryesisht ishte i ngushtë, e në fund fitores iu gëzuan prizrenasit.

Në momentet më kritike të ndeshjes, Arti Hajdari i pejanëve dështoi në gjuajtjen për tri pikë, e në anën tjetër, Ty Nichols tejet i qetë i shënoi dy gjuajtjet e tij të lira, për ta çuar rezultatin në 96-92 kur kishin mbetur vetëm 10 sekonda deri në fund. Në ato sekonda të mbetura për tri pikë tentoi Drilon Hajrizi i pejanëve, por gjuajtja e tij ishte e pasaktë dhe ndeshja u mbyll me rezultatin final 96-92.

TABELA AKTUALE

Më i dalluari në fitoren e Prizrenit sonte ishte qendra Urim Zenelaj me 25 pikë, 19 kërcime e 5 asistime, kurse te Peja më i dalluari ishte Dardan Berisha, i cili në ndeshjen e tij të parë në kuadër të Superligës pas rikthimit te Peja shënoi plot 35 pikë, 21 prej tyre në pjesën e parë, ndërkohë që luajti edhe me 11 kërcime e 6 asistime. Përveç tij te Peja u veçuan edhe Drilon Hajrizi me 24 pikë dhe Henrik Sirko me 13 pikë, 11 kërcime e 2 asistime.

Kështu, Prizreni tashmë ka bilanc 10-7 dhe ngjitet në vendin e katërt në tabelë, kurse Peja me bilanc 9-8 ndodhet dy vende më poshtë.