S’ka fitore as kësaj radhe

Kosova ka pësuar humbje edhe në ndeshjen e katërt të kualifikimeve për Eurobasket 2017, garë kjo debutuese për ekipin tonë.

Ndryshe nga ndeshja e parë, kur ishim mposhtur me rezultat bindës nga favoritja kryesore e grupit, Sllovenia, kësaj radhe u treguam rival shumë më të denjë, pavarësisht humbjes.

Madje, në pjesën e parë të ndeshjes ishim ne, ata të cilët kishin epërsinë.

Në këtë fakt, rol të rëndësishëm kishte edhe mungesa e vëllezërve Goran dhe Zoran Dragic, të cilët siç duket ishin lënë për t’u pushuar nga përzgjedhësi i ekipit slloven.

TABELAT AKTUALE NË KUALIFIKIMET PËR EUROBASKET

Të udhëhequr nga Dardan Berisha dhe Justin Doellman, Kosova mbizotëronte në dy çerekët e parë, derisa sllovenët mbaheshin në lojë me anë të pikëve të Klemen Prepelic dhe lojës së mirë nën kosh të qendrës Gasper Vidmar.

Mysafirët e shfrytëzuan në mënyrën më të mirë lodhjen e basketbollistëve tanë, të cilët filluan të bien nga loja në cerekun e tretë dhe kjo ishte e mjaftueshme që Sllovenia të krijojë epërsi aq sa ta pret e qetë fundin e takimit.

Klemen Prepelic ishte koshashënuesi më i mirë i ndeshjes me 27 pikë, prej tyre 5 trepikësha, derisa te Kosova Justin Doellman më në fund arriti të shpërthejë duke shënuar 30 pikë, por jo edhe të mjaftueshëm për ta befasuar kundërshtarin.

Te Sllovenia edhe në këtë ndeshje luajti basketbollisti kosovar, Gëzim Morina, i cili u aktivizua për 1 minutë e 43 sekonda, për të mos lënë asnjë gjurmë në këtë ndeshje.