‘S’ka përfunduar asgjë’

Trajneri kroat i Pejës, Boris Kurtovic, që po hyn në histori të klubit verdhezi si trajner që i dërgoi për herë të parë në gjysmëfinale të ligës ballkanike, ka bërë të ditur se pas shumë problemeve, Peja ka arritur të shënojë fitore të merituar në Bullgari. 

“Kemi pasur shumë probleme para ndeshjes dhe unë mendoja se si ta ngadalësojmë Rilskin. Këtë nuk e arritëm fare në pjesë të parë të ndeshjes, por në pjesën e dytë e nisëm atë që kishim planifikuar për tërë ndeshjen,” ka thënë Kurtovic për faqen zyrtare të ligës ballkanike, balkanleague.net, sot. 

“Jam tepër i lumtur për rezultatin e arritur, por ende asgjë s’ka përfunduar. Disa lojtarë nuk janë stërvitur qe 10 ditë, që është problem për ne. Kemi edhe 7 ditë për tu përgatitur rekuperimin për ndeshjen e kthimit. Do të ketë shumë tifozë në ndeshjen e kthimit, pasi që është ndeshje historike, e ne do të bëjmë më të mirën tonë, pastaj do të shohim se çka ndodh,” ka përfunduar kroati. 

Peja ka shënuar fitore minimale ndaj Rilskit mbrëmë në ndeshjen e parë gjysmëfinale të garës, derisa një javë më vonë e pret ekipin bullgar në Pejë. 

Në rast të fitores, Peja do të bëhet ekipi i parë nga Kosova që arrin finalen e kësaj gare, ndërsa për më tepër edhe Prishtina mund të jetë kundërshtare e Pejës në finale.