DERBI KOSOVAR NË BIBL
BOROZANI/A. Paçarizi
Sonte, Bashkimi apo Prishtina?!
28 November, 2016 @14:52
Dueli i parë i dy skuadrave kosovare në Grupin A të ligës ballkanike, zhvillohet sonte me fillim prej orës 19 në “Sezai Surroi” të Prizrenit.
Bashkimi pret Sigal Prishtinën në ndeshjen e shtyer të xhiros së katërt të BIBL, ndërsa me apo pa qëllim koincidon me festën e flamurit kombëtar, 28 nëntorin.
Dy skuadrat në fjalë deri më tani janë takuar dy herë këtë stinor dhe të dyja kanë nga një fitore si vendas ndaj tjetrës. Të dyja këto ndeshje janë zhvilluar në kuadër të Superligës së Kosovës.
Bashkimi deri sot ka zhvilluar 5 ndeshje në Grupin A të BIBL dhe ka një fitore të vetme krahas 4 disfatave.
Në anën tjetër, Sigal Prishtina, ka zhvilluar një ndeshje të cilën e ka pësuar nga Beroe në fillim të stinorit.
Sonte, derbi dhe ndeshje interesante do të ketë, ndërsa fituesi pritet të dihet krejt në fund të ndeshjes. Te Bashkimi aktualisht formë të mirë janë duke treguar Kejuan Johnson dhe Eric Palm, ndërsa te Sigal Prishtina MJ Rhett dhe Bojan Trajkovski.
