Suhareka frymëzohet me Yllin

Basketbollisti i ri vendor, që nisi karrierën në Turqi dhe po e vazhdon në Kosovë, ka vlerësuar lartë ekipin e tij të tashëm, tifozët dhe në përgjithësi qytetin e Suharekës - pas përfundimit të stinorit vjeshtor. 

Erris Nushi ka vlerësuar Suharekën si qytet që frymëzohet nga basketbolli. 

“Këtë stinor më erdhi mundësia që t’i bashkangjitem një qyteti që me plotë kuptimin e fjalës frymëzohet me basketboll. Kjo është Suhareka me ekipin e tij, Ylli. Falenderim i veçantë për tifozët, që nuk hezituan asnjëherë të na përkrahin, pastaj trajneri Agron Berisha, që nuk u dorëzua asnjëherë përballë sfidave,” ka shkruar basketbollisti 18 vjeç në llogarinë e tij të Facebookut sot. 

Ai gjithashtu ka shtuar se ekipi i tij ka qenë i vetmi në Superligë që përveç Pejës i ka bërë ballë Sigal Prishtinës në një ndeshje, derisa ëmbëlsira e vjeshtës ka qenë fitorja me 47 pikë diferencë ndaj Trepçës mbrëmë. 

“Shpresoj që kjo atmosferë të mbizotërojë edhe në gjysmëstinorin pranveror,” ka përfunduar ai mesazhin drejtuar Suharekës. 

Nushi dy stinorë më parë u kthye në Kosovë, ku nisi të djersit fanellën e RTV 21. Më pas ai kaloi te Peja, ndërsa këtë stinor veshi fanellën e ekipit të rikthyer në elitë, Yllit. 

Ylli në fund të vjeshtës me fitoren e mbrëmshme ka arritur që të përfundojë në pozitën e pestë të klasifikimit duke e rrëzuar Vëllaznimin në vend të gjashtë. 

Gjatë vjeshtës në Superligë, Nushi ka regjistruar mesatare prej 5.4 pikëve, 1.5 kërcimeve dhe 1 asistim për ndeshje.