Tanjevic jep dorëheqje

Bogdan Tanjevic ka dhënë dorëheqje nga posti i përzgjedhësit të përfaqësueses turke në basketboll. Boshnjaku 66 vjeçar prej të cilit pritej shumë në Eurobasket 2013 ka dështuar totalisht me ekipin e tij dhe përzgjedhjen e lojtarëve si në lojë ashtu edhe në taktikë. 

“Para së gjithash marr tërë përgjegjësinë për këtë rezultat. Sinqerisht, më shumë kam përgatitur skuadrën për fazën e dytë dhe çerekfinale, por ja që ne nuk arritëm të kalojmë as fazën e parë, për të cilën mendoja se do ta kalojmë pa problem. I falenderoj të gjithëve, kjo është familja ime dhe e dua këtë vend,” ka thënë Tanjevic sot në konferencën për shtyp në Abdi Ipekçi Arena të Stambollit. 

Turqia ka shënuar vetëm një fitore nga pesë ndeshje të fazës së parë të Eurobasket 2013, duke përfunduar e parafundit në Grupin D, që do të thoshte eliminim direkt nga Kampionati Europian.