T’i njohim kundërshtarët…

Përfaqësuesja e Kosovës në basketboll, në debutimin e saj në garat ndërkombëtare, sipas shortit të hedhur sot, ka mësuar kundërshtarët e saj. Sipas këtij shorti, Kosova do të përballet me Slloveninë, Ukrainën dhe Bullgarinë, në kuadër të grupit E të kualifikimeve për Eurobasket 2017.

Sllovenia

Pa dyshim, favoriti kryesor i grupit. Sllovenia që nga Eurobasketi i vitit 1993 (para këtij viti ka garuar nën përfaqësuesen e Jugosllavisë) është pjesëmarrëse e rregullt e Eurobasketit.

Suksesi më i madh i arritur në Eurobasket, është në vitin 2009, kur ishte plasuar deri në gjysmëfinale, duke siguruar në fund pozitën e katërt.

Basketbollistët më të mirë aktualisht janë: Zorgan Dragic (Khimki) e Jaka Blazic (Laboral Kutxa), si dhe treshja që luan aktualisht në NBA, Goran Dragic (Miami Heat), Beno Udrih (Miami Heat) dhe Sasha Vujacic (New York Knicks).

Përzgjedhësi i ekipit është trajneri i mirënjohur slloven, Igor Kokoškov, i cili njëkohësisht është ndihmëstrajneri te skuadra Utah Jazz.

Sllovenia sivjet nuk ka arritur të kualifikohej në Lojërat Olimpike në Rio, ndërsa në vitin që e lëmë pas, përkatësisht në Eurobasket 2015, kishte përfunduar në pozitën e 12, pasi ishte mposhtur në 1/8 e finales nga Letonia.

Ukraina

Ukraina është një tjetër rival që mund të cilësohet si shumë i fortë për Kosovën. Pikërishtë në pozitën ku kemi më së shumti problem, pra në pozitën e qendrës, ukrainasit e kanë pikën më të fortë.

Qendra 22 vjeçare 216 centimetërshe, Alex Len, është basketbollisti i vetëm ukrainas që aktualisht luan në NBA, mirëpo ky lojtar përveç ekipeve të grupmoshave të reja nuk ka pasur rast ta vesh fanellë e përfaqësueses A. Një tjetër qendër e rëndësishme është gjiganti Kyrylo Fesenko, ish lojtar i NBA-së, që aktualisht luan për ekipin italian, Pallacanestro Cantu. 

Gjithashtu edhe ish lojtari i Sacramento Kings, amerikani me nënshtetësi të Ukrainës, Eugene Jeter (emri i natyralizuar: Yudzhin Dzheter), është një prej armëve kryesore të ukrainasve.

Ukraina ka qenë pjesëmarrëse në tre herët e fundit në Eurobasket, ndërsa suksesin më të madh e ka arritur në Eurobasketin e vitit 2013, kur përfundoi e gjashta, mirëpo vitin e kaluar ukrainasit nuk arritën të dëshmojnë cilësitë e veta pasi përfunduan të fundit në grup prej 6 ekipeve në Eurobasket 2015.

Bullgaria

Duke pasur parasysh sidomos nga përvoja dhe njohurit me ekipet bullgare në Ligën Ballkanike, mund të thuhet se Bullgaria është përfaqësuesja më e afërt me përfaqësuesen tonë.

Lojtari më i njohur te kjo përfaqësuese është basketbollisti aktual i Sigal Prishtinës, Stanimir Marinov.

Bullgaria për herë të fundit në Eurobasket ka garuar në vitin 2011, kur për pak sa nuk arriti ta kalojë grupin pranë rivalëve aktual, Slloveninë dhe Ukrainën, si dhe rivalëve të fortë si Rusia e Gjeorgjia.

Suksesi më i madh i arritur i Bullgarisë është në vitin 1957 kur u shpall nënkampion i Eurobasketit duke u mposhtur në finale nga Bashkimi Sovjetik.

Basketbollistët kryesor të skuadrës janë Aleksandar Vezenkov (Barcelona), Filip Videnov (Lukoil Academic) dhe Dejan Ivanov (Yesilgiresun). Përveç tyre, në dispozicion mund të jetë edhe amerikani i natyralizuar, Earl Rowland, që aktualisht luan për skuadrën izraelite, Hapoel Jerusalem.