SPORT EKSPRES
Tirana e sheh Trepçën si rival të lehtë
5 October, 2016 @9:58
Dy skuadrat që do të debutojnë në ligën ballkanike këtë stinor, Tirana dhe Trepça, do të ndeshen edhe në duelin hapës të stinorit të ri të BIBL 2016/17.
Derisa Tirana është vendase në duelin e parë dhe e pret ekipin mitrovicas në “Asllan Rusi”, tashmë me përforcimet e fundit të regjistruara, shpreson edhe në fitore ndaj Trepçës dhe sipas gazetave të atjeshme, kjo pritet të jetë lehtë.
“Trepça një shans fillimi me fitore,” - është titulli i vendosur sot te tiranasja Sport Ekspres ndërsa menaxheri i skuadrës, Anxhelo Koleka, ka thënë më tej se me fitore ndaj “kësaj skuadre” dhe maqedonasve të Karpos Sokolit, Tirana synon që të arrijë raundin tjetër të garave të BIBL.
Dueli Tirana - Trepça zhvillohet më 10 tetor 2016 në Tiranë. Këto dy skuadrat garojnë në Grupin B të BIBL 2016/17.
Tirana drejtohet nga trajneri maqedon Slobodan Petrovski, 46 vjeç, që karrierën e trajnerit e ka bërë gjithmonë në ligën maqedonase dhe bardhekaltërit nga kryeqyteti shqiptar do të jenë për të, përvoja e parë jashtë kufinjve.
