Ulpiana përmbys Vjosën për fitore

Skuadra e Ulpianës edhe pse ka qenë në disavantazh dygolësh në ndeshje ndaj Vjosës së drejtuar nga Leotrim Krasniqi, ka arritur që të këndellet në gjysmorëshin e fundit të ndeshjes për të shënuar tri herë në portë të kundërshtarit dhe për të fituar duelin, Ulpiana 3-2 Vjosa [Fidan Gërbeshi 60’pen., Urim Statovci 76’, Endrit Ademi 79’ — Festim Haxhiu 19’, Arijan Abazi 37’].

TABELA AKTUALE

Derisa Ulpiana edhe me ato pak shpresa të mbetura po kërkon lidershipin në Ligë të Parë Grupi B, sot përkundër të gjithave ka siguruar pjesëmarrjen në barazh për Superligë. Ekipi i Emin Bajramit ka dhënë gjithçka nga vetja veçanërisht në 30-minutëshin e fundit të ndeshjes së sotme, për të treguar cilësinë, ndërsa Vjosa në anën tjetër tashmë e mbetur në Ligë të Parë pas ardhjes aty në verën e kaluar, do të synojë që të konsolidojë radhët gjatë verës në ardhje, ashtu që të përgatitet sa më mirë për stinorin vijues.