United shet Schneiderlinin

Manchester United ka arritur marrëveshje me ekipin e kaltër nga Liverpooli, Everton, për shitjen e mesfushorit francez të ekipit, Morgan Schneiderlin.

Mesfushori 27 vjeçar do të shitet për 22 milionë funta kanë bërë të ditur mediat britanike sonte.

Schneiderlin u ble nga Manchester United në kohën e Louis Van Gaalit, në korrik të vitit 2015 për 25 milionë funta nga Southamptoni.

Ai ka zhvilluar 47 ndeshje për “djajt e kuq” nga Old Trafford, ndërsa këtë stinor nën drejtimin e Jose Mourinhos ka pasur 3 paraqitje në Premier Ligë.

“Schneiderlin është shumë afër Evertonit,” ka thënë ndër të tjera Mourinho sonte, pas fitores së ekipit të tij në kuadër të EFL Kupës, ku United mposhti Hull Cityn 2-0 me golat e Juan Matas dhe Marouane Fellainit në pjesë të dytë.

Trajneri i Evertonit, Ronald Koeman, kërkoi publikisht përforcime në ekip pas eliminimit nga Leicester City në kuadër të FA Kupës.

Everton ditë më parë siguroi edhe shërbimet e sulmuesit të talentuar nga Charlton, Ademola Lookman, për 11 milionë funta.

Ekipi nga Goodison Park është duke shqyrtuar mundësinë e blerjes së edhe një lojtari nga United. Fjala është për holandezin Memphis Depay, i cili kishte ardhur në Old Trafford nga PSV Eindhoven në maj të vitit 2015 për 25 milionë funta.