NEW BASKET - PRISHTINA E RE
TOPSPORTI / Arian Paçarizi
Vjen fitorja e parë e New Basketit
17 November, 2019 @9:25
Skuadra nga Prizreni New Basket, duke e mposhtur Prishtinën e Re me rezultat 70-55, e regjistroi fitoren e parë në histori të klubit në kuadër të Ligës së Parë.
New Basketi i drejtuar nga trajneri Fisnik Shpejti, për dallim nga ndeshjeve të kaluara, në këtë ndeshje kërkuan fitoren më shumë. Shënimi i parë në ndeshje erdhi nga Prishtina e Re, derisa më pas New Basketi nuk e lëshoi më epërsinë gjatë tërë ndeshjes.
3 lojtarë te skuadra prizrenase luajtën me pikë dyshifrore. Lavdim Morina ishte koshashënuesi më i mirë me 25 pikë, derisa u ndihmua edhe nga Drini Rexha, që luajti me double-double prej 18 pikëve e 13 kërcimeve dhe Hajriz Hazeri me 15 pikë të tjera.
Te Prishtina e Re u dalluan Engjull Sollova me 22 pikë dhe Arbër Sinani me 13 pikë.
New Basketi me ndeshje më tepër, u ngrit në pozitën e pestë aktualisht. Ata kanë bilanc 1 fitore e 4 humbje, derisa Prishtina e Re me 2 fitore e 2 humbje gjendet në pozitën e katërt.
Në xhiron tjetër New Basketi përballet me Dritën, kurse Prishtina e Re me AS Prishtinën.
