Afërdita Fazlija: Do të bëjmë kombëtare solide

Përzgjedhësja e kombëtare së femrave të Kosovës, Afërditë Fazlija, në deklaratën e saj pas fitores së Kosovës ndaj Maqedonisë Veriore, në miqësoren e zhvilluar sot në Shkup, ka thënë se ekipi me kohë po konsolidohet dhe për kualifikime do të bëhet një kombëtare solide.

Ajo është shprehur të jetë e lumtur për fitoren e arritur, posaçërisht pasi që shumica e lojtareve ishin nga kampionati vendor.

“Këto ndeshjet miqësore janë shumë të rëndësishme dhe të mirëseardhura sidomos kur kemi të bëjmë kryesisht me lojtare nga kampionati vendor dhe kjo është forma më e mirë për të parë cilësitë dhe mundësitë tona. Ishte një lojë e mirë, përkundër se në momente kishim zbrazëtira në mes reparteve, por në përgjithësi ishte një ndeshje e mirë dhe ky ekip mundet të bëjë më mirë dhe më shumë.  Me siguri ky brumë që është dhe me disa futbolliste nga jashtë mendoj se do të kemi një Kombëtare solide për kualifikimet e ardhshme,” ka thënë Fazlija pas fitores.

Kosova mposhti Maqedoninë Veriore 3-1 sot në Shkup.