Bashkimi, në pritje

Skuadra e Bashkimit të Prizrenit që stinorin e kaluar u eliminua nga Sigal Prishtina në gjysmëfinale të Play-Offit 2-1 si dhe në Final Four të Kupës nga Peja, me një treshe të Dardan Berishës në fund, ka filluar stërvitjet këtë javë. 

“Me lojtarët që kemi në dispozicion ne kemi filluar stërvitjet,” ka thënë menaxheri i klubit të portokalltë nga Prizreni, Arlind Kaçaniku. 

Ai më tej ka sqaruar sa i përket çështjes së sponzorit se kryetari i skuadrës ka biseduar me disa kompani, mirëpo ende nuk është nënshkruar asgjë me askë. 

“Kemi biseduar me disa kompani, por marrëveshje nuk ka, pasi që të gjitha palët po i shqyrtojnë ato,” shtoi Kaçaniku. 

Për më tepër prizrenasit kanë bërë gati përforcimet e tyre, mirëpo presin sponzorin për të nënshkruar kontratat. 

“Kemi parë, kemi biseduar dhe kemi zgjedhur përforcimet. Basketbollistët janë të nivelit të lartë dhe do t’u dalim denjësisht përballë Pejës dhe Sigal Prishtinë këtë stinor, së paku si vendas,” ka parashikuar menaxheri i klubit të Bashkimit që përfundoi stinorin në vendin e tretë të Superligës, edicionin e kaluar. 

Bashkimi që stinorin e kaluar nënshkroi marrëveshje sponzorizuese me kompaninë Sigkos, ka mbetur pa atë, pasi që këta të fundit vendosën që të tërhiqen përkundër se kishin nënshkruar kontratë trevjeçare sponsorizimi. 

Bashkimi aktualisht është në bisedime me kompaninë Kosova e Re si dhe me disa transmetues televiziv të ndeshjeve. Mirëpo, asnjëra prej palëve nuk ka konfirmuar ende marrëveshjen pasi që ajo është në fazën e shqyrtimit të projektit.