Bashkimi shton përvojë të madhe në ekip

Bashkimi duket se ka gjetur njeriun e shumëkërkuar që do t’i ndihmojë atyre me përvojë në ekip.  Borozani.com

Ish reprezentuesi i Bosnjës me përvojë nga Eurobasket

Portokallezinjtë kanë arritur marrëveshje me ish reprezentuesin e Bosnjës dhe Hercegovinës, Mujo Tuljkovic, që ka bagazh të madh në karrierë që pritet të sjellë përvojë të madhe te Bashkimi, mëson Borozani.com nga burime brenda klubit prizrenas.

Tuljkovic 34 vjeç luan në pozitat 3-4 dhe vjen te Bashkimi nga Sloboda e Tuzllës, ndërsa ka qenë edhe pjesë e reprezentacionit të Bosnjës bashkë me NBA lojtarin, Mirza Teletovic, një kohë. 

Ai ka nisur karrierën në Cenex të Sarajevës, ndërsa e vazhdoi atë te ekipi Bosna. 

Karriera, në shumë skuadra

Më tej, me Slobododa Tuzlën ka luajtur në Adriatic League për të vazhduar më pas karrierën në Poloni. 

Në Poloni luajti për ekipin ku ka bërë karrierën edhe Dardan Berisha, Anwil. Te Anwili, Tuljkovic, ka arritur mesatare prej 10.7 pikë dhe 5.1 kërcime për ndeshje. 

Nga viti 2011 deri në vitin 2012, basketbollisti në fjalë bëri karrierë në Hungari e Rumani, ku me ekipin hungarez Szolnoki zhvilloi ndeshje në EuroChallenge. 

Prej vitit 2013, ai i riktheht elitës së basketbolli boshnjak, ku luan me Kakanjin (një periudhë kalon përsëri në Poloni te Polpharma), ndërsa së fundi kaloi te Bosna Telecom përsëri, duke vazhduar më pas te Sloboda. 

Bashkimi, më i fortë se në vjeshtë

Boshnjaku 203 centimetra i gjatë njihet si një lojtar që depërton shumë brenda, ndërsa dallohet edhe me precizitet. Njëra ndër karakteristikat e tija të mira është mbrojtja e fortë, që e bën të pëlqehet shumë nga trajnerët. 

Tuljkovic është përforcimi i parë i huaj në afatin kalimtar dimëror te Bashkimi. Para tij, ekipi prizrenas ka arritur marrëveshje edhe me fundorin e Sigal Prishtinës, Muhamed Hasani. 

Bashkimi ka përfunduar pjesën vjeshtore të kampiontit me bilanc 9-5, ndërsa në pjesën praverore kërkon që t’i bëj ballë dyshes lidere të kampionatit, Sigal Prishtinës dhe Pejës. 

Prizrenasit në ditët në vijim pritet të përforcohen edhe me ndonjë lojtar tjetër të huaj, pasi që gjatë dimrit ata shkëputën marrëveshjen me King Tawaski dhe Noel Johnson.