COPPA ITALIA: 1/4
Berisha mposht Hysajn, Atalanta në gjysmëfinale
2 January, 2018 @22:46
Vazhdon forma e mirë e Atalantas nën drejtimin e Gasperinit.
Skuadra nga Bergamo vitin 2018 e nisi në mënyrë fenomenale, duke e eliminuar Napolin vendas nga Kupa e Italisë. Skuadra ku startues i rregullt luan Etrit Berisha sonte triumfoi 1-2 në ‘San Paolo’, për ta larguar Napolin e Elseid Hysajt nga kjo garë dhe për të kaluar kështu në gjysmëfinale.
Berisha dhe Hysaj sonte ishin startues për skuadrat respektive, e në fund fitores iu gëzua portieri i Kombëtares Shqiptare, i cili sonte zhvilloi një paraqitje mjaft të mirë.
Në gjysmëfinale Atalanta e pret fituesin e duelit mes Juventusit e Torinos, duel ky që zhvillohet nesër, ndërsa në gjysmëfinalen tjetër takohen Milani dhe Lazio. Faza gjysmëfinale zhvillohet me sistemin e ndeshjeve kthyese, ku skuadra më e mirë pas dy ndeshjeve kalon në finalen e Olimpicos.
