SHORTI, DATA, ORA DHE SISTEMI
Foto: FFK
Data dhe ora e shortit për playoff të Ligës së Kombeve
19 November, 2024 @12:24
Kanë mbetur edhe nëntë ndeshje të luhen në kuadër të të gjitha grupeve të Ligës së Kombeve për tu kuptuar përfundimisht renditjet në secilin grup të secilës ligë dhe pas kësaj do të hidhet shorti për ndeshjet e playoffit në Ligë të Kombeve si dhe për çerekfinalet e saj.
Në çerekfinale të Ligës së Kombeve, ku luftohet për trofe, luajnë tetë skuadrat më të mira të saja, pra ato që kanë përfunduar në dy vendet e para të Ligës A të Kombeve. Më parë, vetëm fituesit e grupeve të Ligës A kanë shkuar në gjysmëfinale dhe kanë zhvilluar ndeshjet përkatëse për trofe. Sistemi i ri, më i gjerë i garave, po aplikohet nga ky edicion i Ligës së Kombeve.
Ndërkaq të gjitha skuadrat që përfundojnë në vend të tretë të Ligës A, B dhe C luajnë ndeshje playoffi, me vendet e dyta në Ligat B, C dhe D, ashtu që të luftohet për mbetje ose ngritje në një ligë më lartë.
Kujtojmë, UEFA futi këtë sistem garimi për edicionin e tretë të Ligës së Kombeve. Këtë shtëpia e futbollit evropian e arsyetoi me faktin që Liga e Kombeve të jetë më garuese dhe secili shtet të luftojë për diçka. Pra, fituesi shkon një ligë më lartë, i dyti në playoff për ngritje, i treti në playoff për mbijetesë, kurse i katërti bie nga liga.
Shorti, është përcaktuar të fillojë prej orës 12:00 me kohën tonë lokale, këtë të premte, më 22 nëntor 2024. Kurse ndeshjet e çerekfinales për më të fortit e Ligës A dhe ekipet që janë në pozita të playoffit do të zhvillohen më 20 dhe 23 mars të vitit 2025, në sistemin vajtje-ardhje.
Kosova si e dyta në Grupin 2 të Ligës C të Kombeve, do të mund të ndeshet me njërën nga këto reprezentacione nga Liga B: Irlanda, Sllovenia, (Shqipëria, Gjeorgjia, Ukraina - kuptohet sonte cila), (Uellsi ose Islanda, kuptohet sonte cila).
