De Biasi beson në EURO 2016

Edhepse u regjistruar humbja e parë në ciklin kualifikues për Europianin në Francë, Gianni De Biasi, është treguar optimist në një bisedë me mediat italiane, transmeton Supersport sot. 

“Portugalia na krijoi vështirësi, por edhe ne kishim rastet tona të shënonim. Ata janë një prej skuadrave të para në renditjen e FIFA-së dhe jam i kënaqur nga skuadra. Futbolli është sporti më i bukur, por gjithashtu mund të jetë i vrazhdë. Për neve ishte i bukur deri në minutën e 90-të. Gjithsesi duhet të mësojmë nga këto gabime. Kualifikimi në Kampionatin Europian është ende i mundur. Kemi edhe dy ndeshje për të luajtur, duhet ti fitojmë të dyja,” ka thënë fillimisht De Biasi. 

Derisa për ndeshjet e radhës të kuqezinjëve ai ka thënë se çfarë duhet bërë në fushë. 

“Luajmë përballë dy ekipeve që janë jashtë garës. Por, me serbët ekzistojnë këto problemet mes dy tifozerive dhe do të jetë një ndeshje shumë e vështirë. Shpresojmë ti mbyllim sa më mirë kualifikueset, pasi jemi paraqitur shkëlqyeshëm edhe krahasuar me Danimarkën, që është rivali ynë direkt”.

Shqipëria ka mundësinë më të mirë në histori të saj për kualifikim në një Kampionat Europian, që do të fuste atë në trenin e ekipeve që shkojnë drejt Franca 2016.