SERIA FINALE

REUTERS

Demolohet kampioni!

12 June, 2013 @8:30

Danny Green dhe Gary Neal kanë zhvilluar ndeshjen e tyre më të mirë në karrierë duke treguar performancë të jashtëzakonshme në përgjigjen maestrale të San Antonio Spurs ndaj Miami Heat në ndeshjen e tretë të serisë finale në NBA.

San Antonio Spurs demoloi tërësisht kampionin aktual Miami Heat, duke e mposhtur me rezultat të thellë, 113-77.

Green ka qenë koshashënuesi më i mirë i ndeshjes me 27 pikë të shënuara, duke përfshirë këtu edhe shtatë treshe, derisa Neal nga banka rezervë regjistroi 24 pikë.

“Unë vrapoj në parket, provoj të gjejë hapësirë. Kur e shoh ‘dritën’, e lëshoj topin të fluturojë në cak,” ka thënë Green pas fitores së ekipit të tij.

Mbrojtja e Spurs limitoi katër herë MVP-në e NBA-së, Lebron James në vetëm 15 pikë, derisa bashkëlojtarët e tij gjithashtu nuk ishin në nivel të detyrës sot.

Dwyane Wade me 16 pikë ka qenë koshashënuesi më i mirë i kampionit aktual, ndërsa Mike Miller me Lebron Jamesin me 15 sosh kanë qenë më të dalluarit në humbjen katastrofale të ekipit të Erik Spoelstras.

Përkundër se San Antonio Spurs kishte avantazh në dy çerekët e parë të ndeshjes, në çerekun e tretë dhe të katërt - ata krijuan distancë të hatashme në rezultat, ku vetëm ai i fundit përfundoi 35-14 për mamuzat.

Për ndeshjen tjetër, e cila gjithashtu luhet në AT&T Center të San Antonios, në dyshim është paraqitja e Tony Parkerit, i cili morri një lëndim dhe pritet të kuptohet brenda dy ditëve se a është lëndim serioz apo jo.

San Antonio Spurs udhëheq serinë finale tash 2-1. Kampion shpallet ekipi që arrin së pari katër fitore. Dy ndeshjet e radhës luhen në San Antonio, ndërsa po të jetë nevoja, seria vazhdon me dy ndeshje tjera në Miami.

Skema e finales