Duele interesante në fundjavë

Në xhiron e nëntë të Superligës në basketboll këtë fundjavë takohen skuadrat e pjesës së epërme të tabelës mes veti, ashtu si ato të pjesës së poshtme. 

Sigal Prishtina - Bashkimi

Sigal Prishtina dhe Bashkimi luajnë ndeshjen e vetme që do të zhvillohet nesër. Prishtinasit që po vazhdojnë pa humbje në Superligë janë të përgatitur maksimalisht për ndeshje dhe e dinë se nga Bashkimi nuk mund të rrezikohen më shumë se një pjesëlojë, përkundër se prizrenasit shpresojnë për më tepër në ndeshje. 

Në takimin e tyre të parë në Sezai Surroi, Bashkimi ishte mposhtur keq dhe bindshëm nga Sigal Prishtina. Tay Waller dhe Blerim Mazreku kishin shkëlqyer në Prizren, derisa prapa tyre nuk mbetën as Dardan Berisha e Fisnik Rugova. 

Trepça - Peja

Derbi tjetër i javës luhet në Malishevë ku takohen Trepça dhe Peja. Trepça që këtë muaj është kompletuar me të huaj së fundi ka paralajmëruar edhe një ndërrim. Ata në vend të amerikanit Dominique Lacy së fundi kanë paraqitur për regjistrim malaziasin që më parë ka luajtur për Vllazninë e Shkodrës, Zarko Dragicevic. 

Malaziasi pritet t’i sjellë freski mitrovicasve në sulme e mbrojtje, derisa Peja në anën tjetër ka larguar Mirza Ahmedbasicin. Bile, pejanët kanë pasur një mosmarrëveshje mes disa basketbollistëve në ekip, që ka qenë gati të shkaktojë edhe probleme serioze te ata, mirëpo në fund si duket situata është qetësuar me anë të intervenimit të trajnerit Daniel Lutz. Peja ka qenë më e mirë se Trepça në takimin e parë të tyre. 

Besa - Drita

Besa e cila në xhiron e fundit mposhti RTV 21-shin, tashmë do të kërkojë fitore edhe ndaj Dritës në Pejë. Pejanët që po debutojnë në Superligë, me amerikanin e ri, Brad Kanis, kanë fituar gjatësinë e nevojshme nën kosh dhe po vendorët në ekip kanë fituar vetëbesim edhe më shumë tani. 

Drita në anën tjetër, e dobësuar me ikjen e të huajve në ekip, mbrëmë ka paraqitur për regjistrim amerikanin e Teodos së Tivatit. Drita kishte mposhtur Besën në takimin e tyre në Gjilan.

Kastrioti - RTV 21

Në fund, Kastrioti do të pret RTV 21-shin në Ferizaj. RTV 21 që ende nuk ka shijuar fitore me Arben Krasniqin në krye të saj do të kërkojë fitore në Ferizaj, mirëpo ferizajasit mendojnë ndryshe. Ata kërkojnë të shfrytëzojnë maksimalisht basketbollistët e tyre kryesorë për të regjistruar fitoren e dytë të stinorit. 

Fundori amerikan Bryce Cartwright është duke treguar performanca të jashtëzakonshme dhe është njeriu kryesor që mund të shkaktojë dallimin në ndeshje. I përkrahur edhe nga forcat vendore të ferizajasve, nuk do të thotë që RTV 21 do ta ketë lehtë edhe këtë javë. RTV 21 kishte fituar bindshëm ndaj Kastriotit në Prishtinë.

Tabela aktuale para xhiros së nëntë.

SUPERLIGA, Xhiroja IX