Ekipet e Prizrenit mund të mos luajnë më në “Sezai Surroi”

Nëse skuadrat prizrenase që garojnë në elitë të basketbollit të Kosovës nuk sigurojnë ngrohjen dhe temperaturën minimale prej 16 shkallës celzius, ato nuk do të kenë të drejtën të luajnë më në “Sezai Surroi”.

Ngrohjen në parket duhet ta sigurojë teknikisht menaxhmenti i Qendrës Sportive, por kjo aktualisht s’po bëhet.

Çëshja e ngrohjes injorohet nga menaxhmenti i QS-së që po ia hedh fajin KK-së! E QS “Sezai Surroi” në fakt, duhet të vetëmenaxhojë atë, pasi që KK e jep në menaxhim atë. Në anën tjetër, ekipet mund ta pësojnë - me ndeshje jashtë “Sezai Surroit”, që do të ishte një goditje e rëndë për basketbolldashësit e Prizrenit - që aktualisht është qyteti i vetëm me dy skuadra në elitë të basketbollit kosovar.

E ekipet mësohet të kenë marrë njoftimin e fundit nga FBK-ja se në rast se nuk sigurohet ngrohja prej minimalisht 16 gradëve celzius, ndeshja nuk do të zhvillohet fare ose në rastin më të mirë, duhet të luhet në një palestër tjetër ku vendosin skuadrat përkatëse: KB Bashkimi, KB Prizreni, por edhe KBF Bashkimi - që janë ekipe elitare në basketbollin e Kosovës.

Mbetet të shihet se si do të përfundojë situata lidhur me ngrohjen në palestër, ose në rastin më të mirë duhet të shpresohet në temperatura të larta dhe ngrohjen globale për të zhvilluar ekipet ndeshjet!