Ferizaji perfekt, 5 fitore radhazi

Po ky ekip ka qenë i parafundit në klasifikim në janar të këtij viti. Bile, llogaritej që është bashkë me KEK-un pjesë e Ligës së Parë.

Por, me ardhjen e Bylbyl Sokolit dhe angazhimin e disa përforcimeve, Ferizaji tashmë ka shënuar fitoren e pestë rresht dhe besoni apo jo, është në pjesën e epërme të klasifikimit të Superligës!

Bardhekaltërit sot në pjesën e dytë kanë triumfuar në Riza Lushta të Mitrovicës duke e mposhtur Trepçën’89 1-2, pasi që pjesa e parë përfundoi paa gola.

Ka qenë së pari Dardan Çerkini që i dha epërsinë ekipit të tij kur shënoi për 0-1 (54’), ndërsa gati njëzetë minuta më vonë Ermal Krasniqi shënoi për fitore 0-2 (71’).

TABELA AKTUALE

E tëra që ka arritur të bëj Trepça’89 e drejtuar nga Sabit Osmani deri në fund të ndeshjes ka qenë ulja e epërsisë së mysafirëve, duke shënuar përmes Arb Manajt për përfundimtaren 1-2 (82’).

Me këtë fitore Ferizaji është ngritur në pozitën e pestë të tabelës aktualisht dhe është shumë afër sigurimit matematik të ikjes nga rënia. Xhiron që vjen, Ferizaji është mysafir i KEK-ut.

Në anën tjetër, Trepça’89 tash vetëm me golaverazh është ndarë nga zona e barazhit. Ekipi mitrovicas ka pasur ulje-ngritje të mëdha këtë sezon dhe tashmë pritet të shpëtojë nga zona e barazhit, e që në xhiron e radhës do të ketë punë të vështirë. Ndaj Prishtinës në Fadil Vokrri.