Galatasaray zyrtarizon Alvaro Moratën si sulmues të ri të ekipit

Gjigandi turk, Galatasaray, ka bërë të ditur edhe zyrtarisht se është në proces të nënshkrimit të marrëveshjes me sulmuesin spanjoll Alvaro Morata, për ta shtuar atë në radhët e veta.

Galatasaray, që është lider aktual i Superligës turke, në fund të vitit të kaluar pa të lënduar kapitenin Mauro Icardi. Sulmuesi tjetër i famshëm i ekipit Victor Osimhen nuk po mjafton, ndërsa klubi është vënë në funksion për të siguruar edhe një sulmues me emër.

Rekord-kampioni i Turqisë do të nënshkruajë kontratë huazimi 1.5 vjeçare me Milanin për Moratën 32-vjeçar, me obligim blerjeje prej 8 milionë eurove në fund. Kjo, do të bëj që Galatasaray t’ia shtojë spanjollit edhe 2.5 vjet minimalisht në kontratë!

Morata, që në karrierën e tij ka luajtur për Real Madridin, Juventusin, Chelsean, Atletico Madridin dhe së fundi Milanin — do të përfitojë rreth 10 milionë euro në vjet te Galatasarayi.

Ai së fundi është bërë kampion evropian me Spanjën duke fituar EURO 2024 që u mbajt në verën e kaluar në Gjermani.